401. Григорию и Кассиану Авнежским, глас 8:

Православия наставницы, / благочестия и чистоты учителие, / Церкви Вологодстей богодарованное украшение, / преподобнии отцы наши Григорие и Кассиане, / молите Милостиваго Бога, / да вашим предстательством подаст благодать и мир стране нашей / и душам нашим спасение.

402. Григорию Пельшемскому, Вологодскому чдтв., глас 8:

Любовию Христовою, богомудре, просветився, / добродетельми облистал еси: / и всякое наслаждение плотское возненавидев, / и в пустыню вселився, в нейже вельми подвизался еси в жизни сей временней / в пениих и во бдениих, и в пощениих. / Сего ради и Христос даром чудес обогати тя: / но поминай нас чтущих пресветлую память твою, преподобне отче Григорие, / и моли Христа Бога, спастися душам нашим.

403. Григорию, затворнику Печерскому, в Дальних пещерах, глас 1:

Пещерный житель и в телеси Ангел / и чудотворец явился еси, Богоносе отче наш Григорие, / постом, бдением, молитвою Небесная дарования приим, / исцеляеши недужныя и души верою приходящих ти. / Слава Давшему ти крепость, / слава Венчавшему тя, / слава Действующему тобою всем исцеления.

404. Григорию, чудотворцу Печерскому, в Ближних пещерах, глас 3:

Великих дарований приемниче / и великих чудес силою Божиею творителю, / пречудне отче Григорие, / яко велие дерзновение имея ко Христу Богу, / непрестанно о нас молися Ему, / да грехов оставление / подаст душам нашим.

405. Дамиану пресвитеру, целебнику, Иеремии и Матфею прозорливым, Печерским, в Ближних пещерах, глас 1:

Христовых повелений светом сердца своя просветивше, / страстный мрак прогнасте, / те Троицы селение бысте тричисленнии отцы, / Дамиане, Иеремие с Матфеем, / от Неяже благодать приемше, / недужныя исцеляете, будущая возвещаете / и, Ангелом сопричастницы суще, / молитеся Христу Богу даровати нам причастие святых.

406. Даниилу Переяславскому, глас 3:

От юности, блаженне, всего себе Господеви возложив, / выну повинуяся Богу, / противяся же диаволу, / над страстьмй греховными воцарился еси, / тем сам храм Божий быв, / и обитель красну во славу Пресвятыя Троицы воздвигнув / и собранное тобою в ней стадо Христово Богоугодно упасши, / преставился еси к вечным обителем, / отче Данииле, / моли Триипостаснаго во едином Существе Бога спастися душам нашим.

407. Даниилу Столпнику, глас 1:

Терпения столп был еси, / ревновавый праотцем, преподобне,/ Иову во страстех, Иосифу во искушениих, / и Безплотных жительству / сый в телеси, Данииле, отче наш, / моли Христа Бога спастися душам нашим,

408. Дию Константинопольскому, глас 1:

Пустынный житель, и в телеси Ангел, / и чудотворец явился еси, Богоносе отче наш Дие: / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему ти крепость, / слава Венчавшему тя, / слава Действующему тобою всем исцеления.

409. Димитрию Прилуцкому, Вологодскому, глас 1:

Свыше от Бога, преподобне, / благодать приял еси духовную, / и от Него убо познался еси, блаженне, / того ради и ты духом познал еси лучшая Его, / будущаго века пребывание, / и постнически испытався во своих обителех. / И ныне со ангели ликовствуя, / Спасу всех за ны молися, святе Димитрие, да вси вопием: / Слава Давшему ти крепость, / слава Венчавшему тя, / слава Действующему тобою всем исцеления.

410. Тому же святому (Сретение образа прп. Димитрия), глас 4:

Возсия днесь, яко солнце, / пречестный образ священнолепнаго твоего подобия, / паче солнца лучами чудес твоих всех озаряя, / тьму бесовскую без вести творя, / егоже радостно сретаху, / духовныя лики составльше, / непрестанно вопием ти: / Димитрие, отче наш, моли Спаса всех / сохранити град твой и страну нашу, / стаду твоему спасение подавая / и велию милость.

411. Диодору Юрьегорскому, глас 2:

Желанием духа распалився, / мятеж мирский отринув, / ко Единому Богу любовию прилепися / и Того вседушне взыскуя, / во внутреннюю пустыню отыде, / при водах вселися, / идеже в слезах и трудех пребывая многолетное время, / в терпении мнозе житие Ангельское проходил еси / в наставлении Божественнаго разума, / стадо инок собра мудре, / ихже посещая, не остави, Диодоре преподобне, отче наш, / Пресвятей Троице моляся / от зол всяческих избавити и спасти души наша.

412. Дионисию, игумену Глушицкому, глас 1:

Божественною любовию от юности распалаемь,/ Дионисие преподобне, / вся, яже в мире красная, возненавидев, / Христа единаго возлюбил еси / и сего ради во внутреннюю пустыню вселился еси, / со зверьми живый, весь Христови. / Отонудуже и Всевидящее Око, твоя труды видев, / даром чудес и по преставлении обогатил тя есть. / Темже вопием ти: / моли непрестанно о всех нас, / честную память твою присно / в песнех почитающих.

413. Дионисию и Амфилохию Глушицким, глас 8:

Светильницы светлии явльшеся / доброту земную мудренно оставльше / и идоша во внутреннюю пустыню, купно с Дионисием Амфилохие, / смирение и всю добродетель извыкоша и обретоша безсмертие, / постом, и бдением, и прочим воздержанием себе принося Христу, / и ныне на Небесех Престолу Христову предстоя, / молитеся, отцы Богомудрии, Дионисие и Амфилохие, / умирити мир и спастися душам поющих вас, / согрешением оставление даровати, / чтущим всечестную память вашу.

414. Дионисию, затворнику Печерскому, в Дальних пещерах, глас 4:

Жертву Безкровную приносивый Господеви непорочне / и служивый Ему по званию своему многое время неленостне, / священне Дионисие, / молися о нас, / любовию чтущих тя.

415. Дионисию Радонежскому, глас 3:

Земная, прельщающая очеса миролюбцев, / возненавидел еси, отче Богоносне Дионисие, / за уметы та вменив, / шествуя путем скорбным, / и в терпении добр воин Христов явился еси, / победив страсти мира, / был еси до кончины непоколебимый благочестия поборник./ Темже мы днесь, совершая священную память твою, / духовными тя песньми ублажаем и смиренно молим, / да, предстоя Престолу Господа Бога, / ходатайствуеши о спасении душ наших.

416. Досифею Верхнеостровскому, Псков­скому, глас 4:

Яко светильник всесветел явился еси во острове Псковскаго езера, / преподобне отче наш Досифее. / Ты бо крест Христов от юности своея на рамо взем, / усердно Тому последовал еси, / чистотою Богови приближився, / отонудуже и чудес дарованием обогатился еси. / Темже и мы, притекающе ко святей иконе твоей, умильно глаголем: / отче преподобне, моли Христа Бога / спастися душам нашим.

417. Евфимию Архангелогородскому, глас 4:

Яко сокровище многоценно / и источник, изливающ токи исцелений, / подаде нам Христос честныя мощи твоя, / преподобне Евфимие, / болезни убо отъемлющия страстей различных, / благодать же душам точащия непрестанно, / Егоже моли даровати нам велию милость.

418. Евфимию Великому, глас 4:

Веселися, пустыня нераждающая, / благодушствуй, неболящая, / яко умножи тебе чада муж желаний духовных, / благочестием насадив, / воздержанием воспитав добродетелей в совершенство, / Того молитвами, Христе Боже, / умири живот наш.

419. Евфимию, схимнику Печерскому, в Дальних пещерах, глас 4:

Евфимие всечестне, / преподобным единоревнителю и Ангелом собеседниче, / получивый с ними житием своим чистым и безмолвным вечная благая, / молися Господеви присно о всех нас, / да и мы тех же благ сподобимся.

420. Евфимию, архим. Суздальскому, чдтв., глас 3:

Яко светозарная звезда, / пришел еси от востока на запад, / оставив отечество твое, Нижний Новград, / и, дошед богоспасаемаго града Суждаля, / в нем обитель сотворил еси, / и собрал еси монахов множества, / и, прием дар чудес от Бога, отче Евфимие, / был еси о Христе собеседник / и спостник преподобному Сергию. / С нимже у Христа Бога испроси нам здравие, и спасение,/ и душам нашим велию милость.

421. Евфимию и Харитону Сянжемским, глас 1:

Пустынное и безмолвное житие ваше постнически препроводивше, / Христов бо крест на рамо вземше / и Того стопам усердно последовавше, / на невидимаго врага мужески ополчистеся, и того козни сокрушисте, / молитвами и слезами, чистотою Богови приближившеся, / преподобнии отцы наши Евфимие и Харитоне. / Яко солнце, осияваете светозарными лучами чудес ваших, / всех нас спасите с верою призывающих вас / и творящих честную вашу память, / и, яко имущии дерзновение ко Спасу, / мир мирови испросите и спастися душам нашим.

422. Евфросину Псковскому, глас 4:

Житейскую печаль и всяк мятеж мира сего / любве ради Христовы со дерзновением отвергл еси, блаженне, / и повеленная распятым Господем Иисусом Христом / вся исправил еси, / и, Того ярем взем, во всем воли Его повинулся еси, / и, благочестив делатель, животным заповедем Христовым / благотрудно прилежал еси. / И сего ради Бог прослави тя / и по преставлении чудеса показа от честнаго гроба твоя, / Темже и неоскудно угобзися обитель твоя, / и нищим бысть богатное пристанище и покров, / отче наш преподобне Евфросине, / моли Христа Бога, да спасет души наша.

423. Евфросинии, в миру Евдокии, вел. кн. Московской, глас 8:

По земнем вдовстве Небесному Жениху себе уневестивши / и в княжестем чертозе подвижнически поживши, / послежде и чертог, и чад твоих Бога ради оставила еси, / преподобная Евфросиние, / и, вшедши во обитель, тобою созданную, / во иноческом образе многи подвиги показала еси, / и святое житие по благодати Божией блаженною кончиною увенчала еси /. И ныне, предстоящи Христу Богу, / моли спастися душам нашим.

424. Евфросинии, игумении Полоцкой, глас 4:

Подражающи дванадесятолетна дванадесятолетну Христу, / учившему во святилищи Божию слову, / последовала еси, Евфросиние. / Славу временную и земнаго обручника оставльши / и вся мирская презревши, / краснейшему паче всех Христу себе уневестила еси, / крест вземши, путем ангельскаго жития шествующи / и многия к Нему наставляющи, / во благоухании мира в Небесный Чертог востекла еси, / идеже моли, Егоже возлюбила еси, / о чтущих благочестно память твою.

425. Евфросинии Суздальской, глас 4:

Святая твоя память Суждальскую страну веселит, / верных же вся созывает во всечестный храм твой, / идеже ныне совершается всеславная память твоя, Евфросиние преподобная: / моли Христа Бога, / спастися душам нашим.

426. Елеазару Анзерскому, глас 3:

Отверг плоти тленная, / нетленных потщался еси достигнути, / и, мира удалився, / вселился еси в морский остров, / и на нем усердно многа лета Господеви поработал еси, / сего ради и дары прозрения и чудес обогатился еси,/ отче преподобне Елеазаре. / Христа Бога моли даровати нам мир и велию милость.

427. Елисею Лавришевскому и свт. Лав­рентию, затворнику Печерскому, еп. Ту­ровскому, в Ближних пещерах, глас 3:

Преподобне отче наш Елиссее, / с Лаврентием чудным подвизался еси, учителю своему подражая, / земную славу и честь стопам Христа повергли есте, / темже Господь увенча вас / нетленным венцем славы Своея.

428. Еразму Печерскому, в Ближних пещерах, глас 4:

Благолепие дому Господня любя, / расточил еси нещадно имение твое во украшение того, / преподобне Еразме, / тем ныне живя в дому Господни на Небеси, / моли и нам освятитися в жилище Господне.

429. Ефрему Новоторжскому, глас 1:

Божественною свыше благодатию просветився, Богомудре, / и по смерти яви тя светлость жития твоего, / темже источаеши мирови благоухание, / иже с верою притекающим к раце мощей твоих, Ефреме преподобне. / Тем вопием ти: / слава Давшему ти чудесем благодать, / слава Прославльшему тя в чудесех, / слава Действующему тобою всем исцеления.

430. Ефрему Перекомскому, Новгород­скому чдтв., глас 4:

От юности твоея весь Богови поработился еси, блаженне: / и Того ради любве отечество и род оставил еси, / в пустыню вселився, в нейже жестокое житие показав, / и чудес дарования от Бога приял еси, Ефреме преподобне: / моли Христа Бога, да спасет души наша.

431. Ефрему Печерскому, еп. Переяславскому, глас 8:

Духом горя путешествия к святым местом, / странствовал еси в Греческую землю, / святителю Ефреме, / отнюдуже со многою пользою возвращаяся, / устав святаго Студийскаго монастыря списав, / аки некий многочестен дар, семо принесл еси, / имже и днесь Церковь Российская управляема / славит тебе, истиннаго о ней промысленника.

432. Ефрему Сирину, глас 8:

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Ефреме, отче наш, / моли Христа Бога спастися душам нашим.

433. Захарии, постнику Печерскому, в Дальних пещерах, глас 3:

Постническаго ради твоего жития, блаженне Захарие, / яко приемый велию на бесы крепость, / моли и нам техже козней избыти, / получити грехов прощение / и велию милость.

434. Зинону, постнику Печерскому, в Дальних пещерах, глас 4:

Преподобне отче Зиноне, / преподобне и честне житие твое на земли препроводивый / и тем Богови по премногу благоугодивый, / моли о нас, / чтущих память твою.

435. Зосиме, игумену Соловецкому, глас 4:

Изволением Божественнаго разума / вселился еси в пустыню / и тамо, вперив ум твой в Небесныя обители, / равно Ангелом житие на земли пожив, / в молитвах, и трудех, и пощениих образ был еси твоим учеником. / Отонудуже Бог, видя твое благое изволение, / умножи тебе чада в пустыни, слез твоих теченьми напаяемей. / Но, яко имея дерзновение к Богу, / поминай стадо, еже собрал еси, мудре, /и не забуди, яко же обещался еси, / посещая чад твоих, / Зосимо преподобне, отче наш.

436. Зосиме и Савватию Соловецким, глас 4:

Постническое и равноангельское житие ваше, / преподобнии отцы Зосимо и Савватие, / вселенней познаны сотвори вас чудодеянии различными богоноснии, / просвещайте верою призывающия вы / и чтущия честную память вашу.

437. Тем же святым (Перенесение мо­щей), глас 8:

Яко светильницы явистеся всесветлии / во отоце окияна моря, / преподобнии отцы Зосимо и Савватие, / вы бо, крест Христов на рамо вземше, / усердно Тому последовасте / и, чистотою Богови приближившеся, / отонуду силами чудес обогатистеся. / Темже и мы любезно притекаем к ракам честных мощей ваших и умильно глаголем: / о, преподобнии, молите Христа Бога спастися душам нашим.

438. Зосиме, Савватию и Герману Соловецким, глас 8:

Яко светильницы явистеся всесветлии / во отоце окияна моря, / преподобнии отцы наши Зосимо, Савватие и Германе, / вы бо крест Христов на рамо вземше, / усердно Тому последовасте / и, чистотою Богови приближившеся, / отунудуже силами чудес обогатистеся. / Темже и мы любезно притекаем к ракам честных мощей ваших и умильно глаголем: / о, преподобнии, молите Христа Бога спастися душам нашим.

439. Иакову Железноборовскому, глас 4:

Небеснаго желая, / земная возненавидел еси / и, взем крест свой, последовал еси Христу / и от Него прием дарования чудес, / исцеляти недужныя; / но, яко имея дерзновение ко Святей Троице, / испроси православным Христианом здравие и спасение, / на враги же победу / и не забуди, посещая чад своих, / припадающих к цельбоносному гробу твоему,/ Иакове, преподобне отче наш.

440. Игнатию, архим. Печерскому, в Дальних пещерах, глас 4:

Чистаго ради и непорочнаго твоего жития, / Богоносе отче Игнатие, / приемый от Господа чудотворныя дары исцеляти немощныя, / исцели, молим тя, и немощи наша, / моля о нас Единаго Человеколюбца.

441. Илариону Великому, глас 8:

Слез твоих теченьми пустыни безплодное возделал еси / и, иже из глубины воздыханьми, во сто трудов уплодоносил еси, / и был еси светильник вселенней, / сияя чудесы, Иларионе, отче наш: / моли Христа Бога спастися душам нашим.

442. Илариону Псковоезерскому, Гдовскому, глас 4:

В молитвах бодрствуя, / пресветлый храм Духа Святаго был еси, / темже и чудотворец предивный явился еси, / преподобне отче наш Иларионе. / О нас моли Христа Бога / светом Божественнаго познания просветити ны / и спасти души наша.

443. Илариону, схимнику Печерскому, в Дальних пещерах, глас 1:

Воистину достойне наречен был еси Иларион, / тихостен бо и кроток нрав по имени твоему имел еси, блаженне, / имже кроткому Господу Иисусу благоугодив, / молися Ему о нас рабех твоих.

444. Иннокентию Комельскому, Вологодскому, глас 4:

От юности сосуд избранен был еси / и в житии Богу послужил еси, / иноков наставниче Иннокентие, / потщался еси хуждшее покорити лучшему, / темже и страсти умертвив, / возвысился еси к зрению красоты несозданныя, / в Бозе Емуже предстоиши, / моли, отче, Христа Бога / спастися душам нашим.

445. Иоакиму Сарандопорскому, Осоговскому, глас 7:

Пустынный житель, и в телеси ангел, / и чудотворец явился еси, Богоносе отче наш Иоакиме, / постом, бдением, молитвою, Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя; / слава Действующему тобою всем исцеления.

446. Иоанну Дамаскину, глас 8:

Православия наставниче, / благочестия учителю и чистоты, / вселенныя светильниче, / монашествующих Богодохновенное удобрение, Иоанне премудре, / ученьми твоими вся просветил еси, цевнице духовная, / моли Христа Бога спастися душам нашим.

447. Иоанну, затворнику Святогорскому, глас 8:

В пустыню Святых Гор прешел еси, / мира красоту оставив и крест взем, / последовал еси Христу, / отче наш Иоанне, / пощением, бдением и тяжкими веригами в затворе подвизался еси, / души недужных, приходящих к тебе верою исцеляеши, / и Обители твоея украшение являешися, / темже со Ангелы срадуется, преподобне, дух твой,

448. Иоанну Лествичнику, глас 4:

Яко Божественную лествицу, обретохом, Иоанне преподобне, / твоя Божественныя добродетели, / к Небеси возводящия ны: / добродетелей бо ты был еси воображение. / Тем моли Христа Бога, да спасет души наша.

449. Иоанну Многострадальному, Печерскому, в Ближних пещерах, глас 1:

Терпения столп воистину непоколебимый / и забрало от вражиих стреляний необоримо, / равноангельне и многострадальне отче наш Иоанне, / имуще тя, мы, недостойнии, молимся, / припадающе к честным твоим мощем тепле: / избави нас душетленных страстей плотских и спаси твоими молитвами.

450. Иоанну Пещернику (иже в странах Вавилонских), глас 2:

Несумненно Христа иский, / Христово богатство прияти надеявся, / злата громаду безнадежну сотворь, / скоро прескочи, яко яже посреди Лазаря и богатого пропасть, / и легко воспряну во авраамское недро, / пустынный Иоанне, тезоимените благодати и прозрачному голуби, / тем и от Бога приимый прозрения дар / и честному Феодору епископу изрекий невиденное писание / и благочестиву царю Моавию мученический подвиг. / Темже молим тя, отче: / умоли Христа за ны, чтущия тя.

Часть1| Часть2 | Часть3 | Часть4 | Часть5 | Часть6

Тропарион  ||  Православные ссылки  ||   Почтовая форма  ||  Служебная комната

Copyright © 2000-2004   Webmaster