451. Иоанну Рыльскому, глас 1:

Покаяния основание, прописание умиления, / образ утешения, духовнаго совершения / равноангельное житие твое бысть, преподобне. / В молитвах убо и в пощениих и в слезах пребывавый, / отче Иоанне, / моли Христа Бога о душах наших.

452. Тому же святому (Возвращение мощей из Терново в Рыльский монастырь), глас 4:

Твоих мощей возвращением / обитель твоя обогатися, / церковь же твоя, приемши я, просветися / и, красящися, верных созывает с веселием / светоносный твой светло праздновати день, / грядите, глаголющи, / и приимите благодатей дарования.

453. Иоанну Яренгскому, глас 4:

От земли Возведый тя к вечным обителем / соблюдает и по смерти невредимо тело твое, святе Иоанне, / ты бо в целомудрии и чистоте жития, блаженне, пожил еси, / не осквернив тело, / темже со дерзновением моли Христа Бога спастися душам нашим.

454. Иоанну и Лонгину Яренгским (Пере­несение мощей), глас 8:

Яко звезды многосветлыя, от юности возсиявше, / осветили есте сердца верных пренесением честных мощей ваших, / добродетельми чудес ваших, во плоти яко бо Ангели на земли, показастеся, / пощением насаждени бысте, яко древо при водах воздержания, / напоени струями слез ваших, и скверну омысте, / сего ради явистеся приятелище Божия Духа, Иоанне и Лонгине, / молите Христа Бога спастися душам нашим.

455. Иоанникию Великому, глас 8:

Слез твоих теченьми пустыни безплодное возделал еси, / и, иже из глубины воздыханьми, во сто трудов уплодоносил еси, / и был еси светильник вселенней, / сияя чудесы, Иоанникие, отче наш: / моли Христа Бога спастися душам нашим.

456. Иоанникию Девиченскому, Сербскому, глас 1:

Пощением, молитвами и благодатию Божественною просветився, / земныя концы светло озаряеши благочестно, / чудес благодать от Бога прием, / исцеляеши недуги, духи же лукавыя от человеков отгоняеши, / иже с верою притекают к раце мощей твоих святых, / преподобне отче наш Иоанникие. / Слава Давшему ти благодать, / слава Укрепившему тя, / слава Действующему тобою всем исцеления.

457. Иоасафу, царевичу Индийскому, глас 4:

Из чрева матерня / прекрасное вселение бысть Святаго Духа, / преславне Иоасафе, / и от блаженнаго Варлаама безценный бисер, Христа, / в сердце своем приял еси, / и Божественным Крещением Индию просветил еси, / отеческое же нечестие исправль, / приведе его от тьмы ко свету Богоразумия / и, оставив тленное на земли царство, / пустыню достиг и своего учителя, / темже на Небесех от Живоначальныя Троицы / венцем царским венчася, / моли о нас, чтущих честную твою память.

Величание:

Ублажаем тя, / преподобне отче Иоасафе, / и чтим болезни и труды твоя, / имиже трудился еси / во исповедании Христове.

458. Иоасафу Каменскому, Спасокубенскому, Вологодскому чдтв., глас 2:

Яко древо насажденно при водах воздержания, / струями слез твоих напаяемь, преподобне отче Иоасафе, / сеяв бо слезами, в радости жнеши добродетельныя рукояти. / Тем Великий Мздовоздаятель в житницах Небесных тя сокровище положи, / но поминай чтущих любовию пресветлую память твою, / моли Святую Троицу, преподобне Иоасафе, / спастися душам нашим.

459. Иоасафу Метеорскому, глас 3:

Сердцем и душею возлюбив Христа Господа, / вся красная мира сего оставил еси, / изволил же еси паче в смирении и послушании Богу служити, / нежели на престоле царстем владети. / Сего ради благочестно восхваляем тя / и, святую память твою совершающе, вопием ти: / отче Иоасафе Богоблаженне, / моли Христа Бога о спасении рода нашего христианскаго.

460. Иову, игумену Почаевскому, глас 4:

Возложь на ся иго Христово от юности, преподобне отче Иове, / многолетне свято подвизался еси / на поприще благочестия во обители Угорницстей и на острове Дубенстем, / и, пришед к горе Почаевстей, / знаменанней цельбоносною стопою Пресвятыя Богородицы, / в тесней пещере каменней / богомыслия ради и молитвы многократно заключался еси, / и, благодатию Божиею укрепляяся, / мужественно потрудился еси / на пользу Церкве Христовы и обители твоея, / купно же и противу врагов Православия и благочестия христианского, / и, наставив сицевому ополчению иночествующих, / победители тех представил еси Владыце и Богу. / Того моли спастися душам нашим.

461. Ионе Клименецкому, Олонецкому, глас 4:

Ангельскому житию поревновав, блаженне Ионо, / оставил еси отечество твое, великий Новград, / и, пришед в пределы Олонецкия / и в пустыню вселився, / в трудех, молитвах и слезах подвизался еси, / и, яко мудрый купец, Царствие Небесное наследовал еси. / Темже любовию вопием ти: / моли Христа Бога, / да спасет души наша.

462. Иосифу, игумену Волоцкому, чдтв., глас 4:

Яко постников удобрение и отцев красоту, / милости подателя, рассуждения светильника, / вси вернии, сошедшеся, восхвалим / кротости учителя и ересей посрамителя, / премудраго Иосифа, Российскую звезду, / молящася Господу / помиловатися душам нашим.

463. Иосифу Заоникиевскому, глас 4:

Исперва житие твое, преподобне, / хитростию благоюродства от человек утаено на небесех пред Ангелы явленно, / и аще на земли тмою очес претыкаяся хождаше, / но мысленными крилы на высоту возшед, / Присносущным Светом облистаемь, / во отечествии наследова, / и земных мнящихся красных храмов не требовав, / но в Небесных селех пресветлыя обители стяжал еси, / ни ризами мягкими одеяся, / но паче власяницу возлюбил еси, / и сего ради паче всех имений земных небесная сокровища приобрел еси / и на земли плотян сый со безплотными совокупляяся, / Небесной Царице служа и Той приносимых Ангельских песней насладився, / ихже многие людие желая насладитися не могут. / Сего ради Всевышний Творец образ Свой / и Рождшия Его Богоматере / с высоты воздуха на руце твоя, / яко на Херувимская носила дарова тебе. / От Негоже Присносущным Светом очи твои уясни, / и яко росоточащий облак молитвами твоими весь мир милованный напои. / И ныне в последняя времена святую персть твою, яко Едемский источник во исцеление недугов устрои, / Егоже моли, наставниче наш, чудоносче Иосифе, / даровати нам мир и велию милость.

 464. Иосифу Многоболезненному, Печерскому, в Дальних пещерах, глас 8:

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, сияя чудесы, / Иосифе, отче наш, / моли Христа Бога спастися душам нашим.

465. Ипатию целебнику, Печерскому, в Дальних пещерах, глас 1:

Безначальнаго онаго и тихаго места, / идеже несть печали, ни воздыхания, / достигнути, преподобне, желая, / не дал еси себе зде покоя нимало, / но присно день и нощь в делех всяких / и жестоком житии трудолюбно подвизаяся, пребываеши, / тем желаемого получил уже, Ипатие, / молися о душах наших.

 466. Иринарху, затворнику Ростовскому, глас 4:

Яко мученика добропроизвольна / и преподобных удобрение, / звезду Ростовскую, / в затворе, узах и веригах Господеви благоугодившаго / и чудес благодать от Него приемшаго, / Иринарха предивнаго песньми хвалебными почтим / и, к нему припадающе, умильно глаголем: / отче преподобне, моли Христа Бога / спастися душам нашим.

467. Иринарху Соловецкому, глас 4:

Постническое по Бозе житие возлюбив, / вся плотская мудрования духу покорил еси / и воздержанием страсти умертвил еси, / во трудех, и бдениих, и молитвах образ быв добродетели, / тем монашескаго жития наставник показался еси, / отче преподобне Иринарше. / Моли Христа Бога спастися душам нашим.

468. Иродиону Илоезерскому, глас 4:

Возсия днесь светло, радуется град Белоезеро, / имея во области своей великаго светильника, блаженнаго отца Иродиона. / Сошедшеся убо людие и празднующе пресветлую память его, осиявающу многими деянии чудес дара. / Просящим с верою исцеления, / страждущим от различных недуг подает здравие. / Яко финикс насажден в дому Божия Матере, / яко кедр при водах благодатию Христовою растущ. / И яко же шипок благовонен обстоянии водами огражден. / И мы, чада твоя суще, припадающе, молимтися: / моли Пресвятую Троицу, / еже сохранитися граду нашему от нахождения иноплеменник / и от враг видимых и невидимых. / Яко да твоими, отче, ко Господу молитвами спасаемии / всегда просим с верою у тебе: / моли о нас Христа Бога спастися душам нашим.

469. Исаакию, затворнику Печерскому, в Ближних пещерах, глас 2:

Светлости святых насладитися вожделев, / в темную вселился еси пещеру, прехвальне, / и добре подвизался еси, Исаакие, / прельщен же быв от врага, / паки крепко попрал еси того вся коварства. / И ныне, яко победитель, / в веселии предстоя Христу Богу, / проси нам мира и велия милости.

470. Кассиану Греку, Угличскому чдтв., глас 4:

Ветхаго Рима имея воспитание, / державу отечества своего, град Мангупский, оставль, / и нивочтоже вменил еси княжение / и славу маловременную суетнаго века Христа ради, / и паче земнаго богатства избра богатство себе Небесное и славу вечную, / возвысив ум свой к Богу, / и житие свое со Ангелы вожделел еси восприяти, / промышлением Божественнаго разума направляемь / и Богоспасаемаго Углича града достигл еси, / и близ в пределех области его над Волгою рекою в пустыню вселився, / и обитель преславну в честь Божия Матере воздвигл еси, / и в ней тело свое предложив яко дар освящен. / Тем молим тя, отче Кассиане, / моли Христа Бога, / да спасет души наша.

471. Кассиану послушнику и постнику, Печерскому, в Дальних пещерах, глас 8:

В тебе, отче Кассиане, известно спасеся еже по образу, / восприем бо крест и последовав Христови, / творил еси заповеди Его тщательне. / Темже ныне со Ангелы радуется, преподобне, дух твой.

472. Кассиану Римлянину, глас 8:

Постом предочистився, премудрости постигл еси разумение, / от пустынных же Богоносных отец научился еси страстей обузданию. / Того ради подаждь нам твоими молитвами / плоти нашея духу послушание: / еси бо наставник, Кассиане преподобне, / всем поющим о Христе твою память.

473. Кириаку отшельнику, глас 1:

Пустынный житель, и в телеси ангел, / и чудотворец показался еси Бого носе отче наш Кириаче, / постом, бдением, молитвою, небесная дарования приим, / исцеляеши недужныя, и души верою притекающих к тебе. / Слава Давшему ти крепость, / слава Венчавшему тя, / слава Действующему тобою всем исцеления.

474. Кириллу, игумену Белоезерскому, глас 1:

Яко крин в пустыни Давидски процвел еси, отче Кирилле, / злострастия терние искореняя,/ и собрал еси в ней ученик множество, / страхом Божиим и учением твоим наставляемых, / ихже и до конца яко чадолюбивый отец / не оставил еси посещая, да вси вопием: / слава Давшему ти крепость, / слава Венчавшему тя, / слава Действующему тобою всем исцеления.

475. Кириллу Новоезерскому, глас 8:

Божиим Духом подвизаемь, / слез твоих тучами изсохшее напоил еси, / и безплотное в пустыни житие показал еси, / и еже из глубины сердца бодренными молитвами и постом / благодеяния труды уплодоносил еси, / и вселенную всю просветил еси сиянием чудес твоих, / отче наш Кирилле. / Моли Христа Бога, спастися душам нашим.

476. Тому же святому (Обретение мощей), глас 8:

Яко светильник явился еси всесветел / во отоце Нова езера на Красном острове, / преподобне отче Кирилле, / ты бо крест Христов на рамо взем, / усердно Тому последовал еси, / чистотою Богови приближився, / от Негоже и силами чудес обогатися, / тем и мы любезно прибегаем к раце честных мощей твоих, умильно глаголем: / о, преподобне отче Кирилле! / моли Христа Бога спастися душам нашим.

477. Кириллу Челмогорскому, глас 4:

Днесь возсия нам пресветлая память твоя, славне / яко солнце светозарное, / лучами благодати озаряющи весь мир / и тьму нощи злых духов и от нас отгоняющи. / Днесь Небесныя силы святых Ангел, и мирской народ, / и души праведных мысленно торжествуют, радующеся, / днесь и мы, грешнии, припадающе, молимся; / отче преподобне Кирилле, / Христа Бога моли непрестанно / спасти град и люди, / иже любезно тебе почитающия.

478. Кириллу и Марии, схимм. Радонежским, глас 3:

Блаженств Христовых причастницы, / честнаго супружества и попечения о чадех добрый образе, / праведнии Кирилле и Марие, / плод благочестия, Сергия преподобнаго, нам явившии, / с ним же усердно молите Господа / низпослати нам дух любве и смиренномудрия, / да в мире и единомыслии / прославим Троицу Единосущную.

479. Константину и Косме Косинским, Старорусским, глас 3:

Яко великаго во отцех Варлаама ученик, / прехвальне Константине, / и сам чадо послушания, блаженнаго Косму, возрастил еси, / темже, преподобнии, вкупе Престолу Владычню ныне предстоящии, / молитвами вашими в вере Православней нас утвердите, / в послушании Церкви Святей укрепите / и вся полезная душам нашим испросите.

480. Корнилию, чдтв. Комельскому, глас 4:

От юности горящим желанием Божественныя любве разжигаемь, / житейския молвы оставил еси, преподобне, / ревнитель Антонию Великому быв, / безмолвием и жестоким пребыванием последуя Христу, / бдением, и молитвами, и постом образ был еси твоим учеником. / Темже молися Господеви, Корнилие блаженне, / спастися душам нашим.

481. Корнилию, игумену Палеостровскому, Олонецкому, глас 5:

От юности, премудре, прилежно подвизався, / от Бога наставляемь, / отечество свое оставль - град Псков, / и вселися в пустыню, / во отоце великаго езера Онега, / иноки собра мудре / и извещением Святаго Духа обитель согради / и храм созда Пресвятей Богородице / в похвалу Рождества Ея, / струями же слез твоих / безплотныя враги погрузил еси / и жития твоего целомудрием со ангельскими лики совокупися, / преподобне отче Корнилие, / с нимиже Христа Бога моли / спастися душам нашим.

482. Корнилию Переяславскому, глас 8:

Новоявленнаго угодника Божия почтим, / Корнилия преподобнаго, / крест на рамо вземшаго, / иго Христово усердно понесшаго, / иже на невидимыя враги мужественно подвизався / и козни их поправ, яко добр воин, / Владыце Христу предста и молится о душах наших.

483. Косме, епископу Маиумскому, глас 8:

Православия наставниче, / благочестия учителю и чистоты, / вселенныя светильниче, / архиереев богодухновенное удобрение, / Космо премудре, / ученьми твоими вся просветил еси, цевнице духовная, / моли Христа Бога спастися душам нашим.

484. Косме Яхромскому, глас 4:

Горняго желая премирнаго жития, / дольняя возненавидел еси, / и, взем крест свой, последовал еси Христу, / и в пустыню вселился еси, досточудне, / в ней подвизася в пениих, в бдениих и пощениих. / Темже в тя вселися Пресвятый Дух, / но яко имея дерзновение ко Христу Богу, / испроси людем православным здравие и спасение / и не забуди посещая чад своих, / совершающих священную память твою, / Космо, преподобне отче наш.

485. Ксенофонту Робейскому, глас 4:

Пустыни явился еси доброе прозябение, / отче преподобне, / от юности бо чистое житие изволил еси, / духовному учителю последуя, / и, того учением ум твой к Небесным вперив, / в пустыню вселился еси, / и в ней обитель создал еси, / и стаду твоему премудр наставник показался еси, / великому же Новуграду похвала и утверждение, / темже и Христос, яко пресветла светильника, / чудесы обогати и прослави тя. / Ксенофонте, отче наш, / моли Христа Бога спастися душам нашим.

486. Кукше Новому, Одесскому, глас 4:

От юности мир суемудреный и лукавый оставил еси, / Божественною свыше просветився благодатию, преподобне, / многим терпением во временней жизни подвиг совершил еси, / темже источаеши чудес благодать всем с верою приходящим к раце мощей твоих, / Кукшо, преблаженне отче наш.

487. Кукше, сщмч. и Пимену постнику, Печерским, в Ближних пещерах, глас 3:

Мученическою кровию, священне Кукше, / в проповеди Евангелия со учеником ти, блаженным Никоном, честне украсивыйся, / и Пимене, в постничестве светозарно просиявый, / в един день и час внидосте в свет незаходимый, / идеже молитеся Господеви, / да подаст нам велию милость.

488. Лаврентию, затворнику Печерскому, в Дальних пещерах, глас 3:

Затворивый себе Господа ради в темней пещере, / преподобне отче Лаврентие, многолетне / и Оному добре в ней угодивый, / подаждь и нам от всякаго зла чувствия затворити, / и тьмы страстей отвратитися, / и светлость получити Царствия Небеснаго.

489. Лаврентию, затворнику Печерскому, епископу Туровскому, в Ближних пещерах, глас 8:

Всеблаженне Лаврентие, / затворивый себе Господа ради в месте тесне / и в нем многа лета трудолюбне поживый, / молися о нас ко Господу, / яко да и мы от всякаго греха чувства затворше, / получим отверзение дверей милости Господни в День судный.

490. Лаврентию Черниговскому, глас 4:

От юности Христа возлюбил еси, / и Тому тесным путем последуя, / сосуд избран Духа Святаго быв, / дар чудотворения и прозрения восприим: / сего ради в невечернем свете Пресвятыя Троицы присно радуяся, / поминай чад Твоих, / Лаврентие преподобне, отче наш.

491. Лазарю Галисийскому, глас 8:

Бденными молитвами, теченьми слезными столп омочил еси, / и из глубины воздыханьми / во сто трудов уплодоносил  еси, / и был еси пастырь, всем подая прощение, / преподобне отче наш Лазаре: / молися Христу Богу / спастися душам нашим.

492. Леониду Устьнедумскому, глас 1:

Божественною любовию и житием духовным / от юности распалився, преподобне, / и вся, яже в мире красная, возненавидев, / Христа единаго от души возлюбил еси, отче, / легкое иго на рамо взем, / Божественным Промыслом и Пречистыя Богородицы чудным явлением направляемь / достиже пустыни / и в ней многолетне подвизался еси / в трудех многих и слезах, / всяким злостраданием плоть свою изнуряя. / Отонудуже Бог, твоя труды видев, / умножи тебе чада в пустыни. / Но яко имея дерзновение к Богу, / моли о нас, рабех твоих, отче преподобне Леониде, / да избавит нас от всех навет вражиих / и спасет души наша.

493. Леонтию, канонарху Печерскому, в Дальних пещерах, глас 3:

Всечестный канонарше Леонтие, / правилоначальный бывый в церкви / и в правиле иночестем возсиявший светло, / моли Христа Бога, / да прегрешений оставление / подаст душам нашим.

494. Лонгину Коряжемскому, глас 1:

От мятежа мирскаго удалився, / к немерцающему Свету притекл еси, преподобне отче Лонгине, / и ныне чисте зриши Святую Троицу, / Юже моли за ны недостойныя, / да спасет души наша.

495. Лонгину, вратарю Печерскому, в Дальних пещерах, глас 1:

Преподобне и Богоблаженне отче Лонгине, / врат монастырских опасный хранителю, / опаснейший же и неусыпный своих чувствий / от всякаго мирскаго суетствия затворителю, / моли нарекшаго Себе дверь Господа Славы, / да отверзет нам дверь милости Своея.

496. Лонгину Яренгскому, глас 1:

Свыше Божественною благодатию просветився Богомудре, / многим терпением во временней жизни течение совершил еси, / темже и по успении источаеши чудесем благодать, / иже с верою приходящим к тебе, Лонгине всеблаженне. / Слава Давшему ти крепость, / слава Прославльшему тя в чудесех, / слава Действующему тобою всем исцеление.

497. Макарию Великому, Египетскому, глас 1:

Пустынный житель, и во плоти Ангел, / и чудотворец явился еси, Богоносе отче наш Макарие, / постом, бдением, молитвою Небесная дарования приим, / исцеляеши недужныя и души верою приходящих ти. / Слава Давшему ти крепость, / слава Венчавшему тя, / слава Действующему тобою всем исцеления.

498. Макарию Жабынскому, Белевскому чдтв., глас 4:

От мирскаго жития изшед / в тихое пристанище жизни иноческия, преподобне Макарие, вшел еси, / в нейже добре подвизався, душу твою добродетельми превысокими обогатил еси, / и явился еси добр пастырь и учитель иноческому собору, / емуже и обитель возградил еси, / таже в безмолвие вшед и Боговидения сподобився, ко Господу преставился еси, / Иже даром чудес тя обогати. / Егоже ныне моли, / да спасет верою и любовию почитающих святую память твою.

499. Макарию Желтоводскому, Унженскому, глас 5:

Днесь град твой Галич тобою хвалится, / в концех бо его пресветло, / яко велие солнце, возсиял еси / и чудесы твоими, преподобне Макарие, вся озарил еси. / И ныне молися Господеви / избавитися душам нашим от прелести вражия / и спастися граду твоему от поганскаго наития.

500. Макарию, игумену Калязинскому, чдтв., глас 8:

Плотская мудрования, отче Макарие, / воздержанием и бдением умертвил еси, / место бо, на немже поты твоя излиял еси, / яко труба, вопиет к Богу, / поведающи твоя исправления, / и по смерти честныя твоя мощи источают исцеления. / Темже вопием ти: / моли Христа Бога, да спасет души наша.

Часть1| Часть2 | Часть3 | Часть4 | Часть5 | Часть6

Тропарион  ||  Православные ссылки  ||   Почтовая форма  ||  Служебная комната

Copyright © 2000-2004   Webmaster